Arnarlax verður Bakhjarl Íslenska landsliðsins í handbolta

HSÍ og Arnarlax hafa undirritað samkomulag þess efnis að Arnarlax verði einn af bakhjörlum HSÍ að minnsta kosti til næstu þriggja ára. HM kvenna hefst í næstu viku í Noregi, Svíþjóð og Danmörku og mun Arnarlax hafa frá og með því sitt vörumerki á baki allra keppnistreyja landsliða Íslands í handbolta.

Það eru stór verkefni framundan hjá HSÍ. A landsliðs kvenna heldur af landi brott á morgun og tekur liðið þátt í Posten Cup í undirbúningi liðsins fyrir þátttöku sína á HM. Stelpurnar halda svo frá Stavanger þar sem liðið leikur sinn fyrsta leik á stórmóti frá 2012, þann 30. nóvember gegn Slóveníu. HM kvenna mun standa yfir frá 29. nóvember – 17. desember og verður mótið í beinni útsendingu á RÚV.

Strákarnir okkar halda svo í byrjun janúar til Austurríkis þar sem undirbúningur þeirra fyrir EM hefst með tveimur vináttulandsleikjum gegn heimamönnum. Síðan verður haldið til Munchen þar sem Ísland leikur í C-riðli gegn Ungverjalandi, Serbíu og Svartfjallalandi.

„Það er mikið fagnaðarefni fyrir HSÍ þegar við skrifum undir samstarfssamninga við nýja bakhjarla. Flestir bakhjarlar HSÍ í dag hafa verið í bakvarðasveit okkar í yfir áratugi, það er von okkar hjá HSÍ að samstarfið við Arnarlax verði farsælt og ánægjulegt“ segir Guðmundur B. Ólafsson, formaður HSÍ.

„Við vitum að handbolti er stór hluti af íslensku íþróttalífi og við gætum ekki verið stoltari en að fá að taka þátt í þeirri vegferð sem HSÍ er á. Áfram Ísland!“ segir Björn Hembre, forstjóri Arnarlax.

 

Frétt HSÍ: https://www.hsi.is/bakhjarlar-hsi-og-arnarlax-hefja-samstarf/